من أكتر الأسئلة اللي اتسألتها كمصمم تعليمي سواء من الـ SMEs أو من التيم: ازاي أكتب اسكربت، أنا مش عارف أكتب أو أقول ايه؟

الحقيقة ان المشكلة فى كتابة الاسكربت مش هي هتقول ايه، ولكن هتقولها ازاي.. وعشان كده أول نصيحة بقولها لأي حد بيسألني السؤال ده "اكتب الكلام كأنك بتقوله لحد صاحبك أو زي ما بتكلمني دلوقتي، وبعدين نبقى نشوف هنعمل ايه"

النصيحة ده فى حد ذاتها هتخليك تكتب، وممكن تكتشف إن كتابتك كويسة جداّ وده شفته قبل كده، وممكن يكون فيه بعض الحاجات اللى محتاج تعرفها عشان تحسن كتابتك.. وفي كل الأحوال أي اسكربت هتكتبه لو شفته بعد فترة هيكون فيه تعديلات محتاج تعملها (مهما كنت برنس فى كتابة الاسكربت)..

بس بالاضافة للحاجة البسيطة دي، ايه الخطوات اللي ممكن تمشي عليها عشان تكتب اسكربت جيد؟

1. فى المجال التعليمي أنت المفروض عندك هدف = Objective لكل فيديو (آه لكل فيديو مش بس لكل وحدة أو chapter) وبالتالي أنت كل حاجة هتكتبها هدفها هو تحقيق الـ learning objective للفيديو ده. يبقى أول حاجة حدد الهدف التعليمي للفيديو.
2. جمع ونظم المحتوى للفيديو، ممكن تكون أنت اللى بتبحث بنفسك عن المحتوى لكن غالباً بيكون فيه SME (خبير مادة تعليمية) بيديك المحتوى ده.. دورك هنا انك تقرأ المحتوى وتنظمه فى شكل نقاط او خطوات بحيث تكون عارف انك هتتكلم عن نقطة 1 وبعدين 2 وهكذا.
3. مهم تعرف الـ structure لأي اسكربت: أي اسكربت بيكون مكون من مقدمة intro، ومحتوى body، وخاتمة closure.. بس خد الـ structure ده (تفصيلي أكتر وهيكون أحسن)

ده الـ structure اللي أنا شخصياً بمشي عليه ف كتابة أي اسكربت واللي بشرحه لأي حد بيسأل ازاي يكتب اسكربت وشفت منه نتائج كويسة جداً. تعالي بقى نشوف كل واحدة من دول بالمختصر المفيد.

عناصر/مكونات الاسكربت (Script Structure)

1. الـ Hook: دي أول جملة بتتقال فى الاسكربت وهي اللى بتشد انتباه المستمع وتخليه يكمل أو ميكملش، وممكن تكون سؤال، اقتباس quote، قصة صغيرة جداً، أو معلومة غريبة (بس عن الموضوع مش أي حاجة وخلاص عشان بشوف ده كتير).
2. الـ overview: هنا أنت بتقول بشكل سريع الفيديو ده عبارة عن ايه.. أنت بتقدم للموضوع، الفيديو بيتكلم عن ايه وأنا كمتعلم هستفيد منه ايه. ممكن بطريقة مباشرة أو غير مباشرة. وخلي بالك أنت ممكن تكون عملت ده بشكل كافي مع الـ hook لو كانت قصة أو معلومة طويلة شويه، ففي الحالة دي مش هيكون فيه داعي تطول فيها (جملة تنقل بيها للمحتوى وخلاص).
3. الـ body: ده جزء المحتوى أو المعلومات واللى هو أهم جزء من ناحية الـ learning لأن مش هينفع تعمل hook و overview جامدة، وفى الآخر ميكونش فيه محتوى يفيد المتعلم.. هنا طريقتك فى الكتابة بتعتمد على نوع المحتوى نفسه، فممكن تكون بتعلم خطوات حل المشكلات مثلاَ فأنت هنا هتتكلم عن الخطوات كلها كمقدمة وبعدين تمسك نقطة نقطة وتتكلم فيها.. ممكن برضه تبقى case study داخل الفيديو وأنت بتقولها كلها وبعدين تـ reflect على خطوات حل المشكلات.. ممكن يكون كلام سردي مفيش نقاط محددة وده غالباً مع موضوع نظري اوي بتوضحه للتعلم عشان يبدأ يغير تفكيره..
   
   أياً كان الموضوع أنت هنا بتقسم المحتوى نفسه لمجموعة نقاط أو أفكار رئيسية وبتبدأ تتكلم عن كل نقطة. فيه هنا بعض الـ sequence methods اللي الناس بتستخدمها لكن انا مش حابب اتكلم عنها عشان عمري ما استخدمتها ومش بفضلها، أنا بفضل اني أقرأ المحتوى واشوف أنا ممكن أوصله ازاي بأبسط طريقة.
4. الـ summary: هنا أنت بتلخص اللى اتقال فى الفيديو (ده لو كان الفيديو طويل أو بتكتب مقال) لكن في الفيديوهات اللى 5 دقايق تقريباً ممكن متكتبش ملخص، وتنقل علطول للخاتمة.. الملخص مفيهوش كلام كتير انت بس بتقول أنك اتكلمت عن 123.. أو فى الفيديو ده أنت اتعلمت كذا كذا..
5. الـ closure: من وجهة نظري، الخاتمة هي أكتر حاجة بتعلق فى ذهن المشاهد أو المتعلم. وده لأنها آخر جزء فى الفيديو ومنها هعرف كمتعلم أنا محتاج أعمل ايه بالظبط، أو ايه اللى أنا محتاج أعيد تفكير فيه.. برضه هنا أنت ممكن تضيف CTA=Call To Action يعني حاجة المتعلم يعملها (مش like و subscribe لو سمحت) أنت بتقوله حاجة يعملها تفيده. مثلا ممكن تقوله فيه template حمله وطبق اللى اتعلمته، أو هات ورقة وقلم وفكر هتعمل ايه دلوقتي، أو اقرأ المقال أو الكتاب الفلاني أو شوف كورس كذا عشان تعرف معلومات أكتر عن الموضوع... الأفكار كتير هنا.. وبرضه مش شرط يكون فيه CTA فى الفيديو التعليمي.

ده كده الـ structure اللى تقدر تمشي عليه فى كتابة أي اسكربت.. وبرضه تقدر تستخدمه فى كتابة المقالات، لكن زي ما قلت "قبل ما تكتب حدد الـ objective ونظم المحتوى".. ودلوقتي عايزك تجيب اسكربت كتبته من فترة تطبق عليه الخطوات دي، ولو تقدر تشارك معايا الاسكربت قبل وبعد هكون سعيد جداً بده.. أتمنى يكون المقال مفيد، وشكرا أنك وصلت لحد هنا..